Mein Rödermark (Home)

        Ohne kommerzielle Absichten

Zur Einstimmung auf Oweräierisch

Oweräirerisch – wie schäi –

E Lektion in unsrer Sprache
tun mer jetzt – es werd schun gäi
hochdeutsch, dialektisch sag
Oweräirerisch – wie schäi.

Unser Fiß, ja des seun Laatsche
dicke Boa mer Stempel nennt
un in Fetze iss e Klaadche
was mer ach als Lumpe nennt.

Lumpe äwwer – deß is Zoores
isch hoff seun jetzt koa de heu
Socke – woe mer lernt oft moores
könne Strimp und Weibsleit seu.

Daß en Hersch e Fahrrad äwwer
Gaasegicht e Krankheit iss
seift er – grieht ersch an die Läwwer
wann’s en Oweraierer iss.

Wer bekloppt . beduppt . behämmert
ja der hott in Käwwer goar
un wer anner Leit belämmert
en rafinierter Hund fürwoar.

Un e Böbbche is es Määdche
Speelzeig für die Männerwelt
un e Budde is es Lädche
wer’s net for e Buddik hält.

Zu me Krobbe säit mer Dippe
und mont oft ach Doamehüt
un e Blosse iss e Kippe
die mer oft am Stammtisch sieht.

Funzel säit mer zu de Lampe
un en Krach deß is Krawall
un en Bauch, des iss e Wambe
un e Pill iss in Ball.

Alte Kärrn jedoch seun Scheese
un in Deckel iss in Gong
un in Drecksack iss in Böse
un es Sofa koa Schässelong.

Hoste äbbes an die Erbs hier
a de bist nit ganz dicht
Prominent – deß iss es grouß Dier
un blous du ist oafach – schlicht

Falls de Kloa – in kloane Stobbe
un falls grouß – e Latt mern Schatz
falls de derr – e Stang von Hobbe
falls de stark – in dicke Watz.

Gaagel nennt mer schmale, lange
Ähnlich sou wie ich oan bin
Sporkel – biste komisch gange
host im Kreiz e Stange drin.

Stambes iss Kartoffelbrei hier
Kläis sieht mer im Wasser gäi
Schlambes nenne dann noch Brabs mir
Öweraierisch – wie schäi.

Un e Bäile is a Schlambe
un e Boambel was von Woll
un e Gick des iss e Oanke
die mer öfters wesche soll.

Baldin iss in Schaal, gestrickte
heelt im Genick oft woarm in Schwäärn
mit de Ohrn, de eugedrickte
daun mer horsche anstatt hörn.

Aßem Maul stinkt mer vom Raache
oune Hoarn häst’s: der iss blott
biste verkellt gits Matzelaache
oft mer ach es Grindgusch hot.

Amschel säit mer zu de Nase
die mit Schnupptewack gefüllt
Beebeler hoan do koa Chaase
Sacktischer werrn koa gebielt.

Host e Beern du wie in Kerwes
häst’s dann glei: Der Wasserkopp
knaatsch dut mer Deik for Merwes
oft find’s Schlappmaul ach koan Stop.

Un in Kloawe iss e Pfeif
odder ach in growe Mann
Saffe häßt noch heit die Seife
un in Korb des iss e Mahn.

Stoa säit mer zu de Steine
un in Knorrn deß iss in Ast
un zum Flenne säit mer Greune
un Gefängnis deß iss Knast.

Ja die Mamme iss die Mutter
un die Wurst häßt oafach Worst
un zum Handkees mit de Butter
gibts Eppelwoi forn Dorscht.

Jeder Kasper, der mecht Bosse
un e Saal, deß is e Seil
un e Dreckfloß iss e Goss
un 2 Pferde deß sin Geil.

Äbschte Boole muß mer fasse
Gott verdeppel iss geflucht
Hauptstrooß hieß als Verrergasse
wou mer Geilskneddel gesucht.

Mit em Hixebool un Jeidel
brengt mer oan schnell in die Häi
fehlt blouß noch im Bock sern Beitel
Oweräirerisch wie schäi.

Jetzt e Bord: deß iss in Baspel
un in Kutscher iss in Kerl
un e Rippche iss koan Haspel
un in Bickel iss koa Perl.

Unser Berge deß seun Hiwwel
un in Huwwel jeder kennt
unwanns stinkt is deß e Zwiwwel
die wou in de Aage brennt.

Un in Rüffel iss in Stumber
Riwwelkuche eßt mer gern
un in Kicker iss in Bumber
un die Mannsleit, deß sin Herrn.

Was mer redde iss Gebabbel
wer in Rappel grieht der spinnt
un Geschwätz iss oft Gesabbel
wos im Schnawwel oft entspringt.

Viele Kinner sin Gezäwwel
de Nawwel iss im Bauch seu End
unn die Mehrzahl – deß sin Näwwel
den mer ach als Weschküch nennt

Unser Gockel iss n Gickel
un Gekickel iss gelacht
un in Wääschißer in Pickel
na, wie hab ich deß geesacht.

Unsern Wassem is inn Rase
un e Micke meist e Fliege
un die Ziege, deß sinn Gaase
un de Fiffi iss e Vieche.

Damit ist für heut zu Ende
die Lektion: ich muß jetzt gäi
wannse ner behaale konnte
’s Oweräirerisch – ’s wär schäi.

S’fehle zwar och viele Worte
dies im Lexikon nit gitt
die mer kaum an annern Orte
doch noch brengt hier in de Bütt.

Puhl un Fuhl un Floß un Kennel
Krembel, Krumbel un Dischbutt
Frackschees, Kneppcher – Scherzebennel
Dorschenonner – Keeze – Dutt

Schockelgaul un Persch un Schnersch
Petter, Göödche, Lahmetreter
Schobsel, Masik, Üwwerzwerg
Oadom, Dormel kennt nit jeder.

Stundelang kennt mer noch redde
e Ewigkeit ging deß ser fort
wann mer nerr Zeit hier hette
Oweräirer Wort für Wort
 
 
Mit freundlicher Genehmigung des Heimat- und Geschichtsverein Rödermark
Die wunderschönen Hefte aus Ober-Roden und Urberach können sie hier käuflich erwerben.
 
 

Schreibe einen Kommentar

Mein Rödermark © 2014 Frontier Theme